媽媽, 我愛你.

世上所有媽媽都值得感謝 (包括我自己,哈哈). 不過真係要感謝我媽媽一直的有形無形支持. 就算要係講一百萬個多謝或者係請佢食乜野都不能足夠報答佢既付出. 尤其係一個身份如此特別的媽媽,實在不是一般人或者係一般既媽媽可以做得到.我有時也不明白為什麼她可以做得到, 要知道我不是一個乖巧的小孩, 除了特別靚之外,真係冇優點!
好多人都說我很幸福, 其實我是知道的. 甚至我覺得我自己比細妹更幸福. 自少那個女子離開了, 就只有這個媽媽照顧著. 頑劣的我試過叫佢做八婆, 跟住比老豆打到大比流血,果時都唔明自己做錯d乜. 知道後母一定係衰架啦, 邊有好架.越大就真係知道,什麼叫做母愛, 做了母親之後更加不明白為什麼有些人可以拋棄自己子女不聞不問. 母親我永遠都只有一個, 不要問我以前果個去左邊, 我只係知道我地一家都會感謝佢當年拋棄我同老豆,如果唔係我地而家邊有一個咁幸福既家.
昨晚請了朋友回家吃,不但搞到屋企兩個菲傭一頭煙,仲要媽媽親自來洗碗....(都話要炒左個菲傭架啦). 我朋友話如果我係她女兒,佢會睬我都傻! (媽媽除了愛我們,也常常令我們有face!)
尤其是最近我兒子有事,媽媽更發揮了她超肥....呀係超能力,照顧起幾家人既生活. 照顧阿妹阿孫返學,招呼老豆,同我傾計,輔導兩個菲傭(頂!都話炒左佢地架啦)...仲要照顧阿爺阿麻, 仲要追人魚小姐同大長金.....朝朝6點幾起身夜晚都仲要埋睇刑事偵緝(其實套野叫法證先鋒)....冇得頂.我捱左咁耐唔夠訓既日子已經瘦左10幾磅, 但佢仍然可以keep磅數冇變, 穩如泰山!(雖然佢好想變, 變靚d?!)
除左msn facebook教極唔識之外,呢個阿媽真係有得頂架.
冇說話好講, 媽媽, 我愛你, 一萬年. 幫老豆阿妹阿孫講埋, 加埋4萬年啦!

很無奈

2001年我在自己的舊blog"隨意筆"寫過以下一篇文章:

爺爺 (2001) 昨天與一家人吃晚飯，為了慶祝爺爺的八十歲大壽。我們的爺爺一共有十四個孫兒，我是排行第四的，在我對下是我堂弟弟，也是我們家長子嫡孫。一直以來我也以為 (爺爺表現也令我覺得) 他最喜愛的是我弟弟；而因為爺爺是潮州人的關係，某程度上也重男輕女。
前兩年爺爺因心臟有事入醫院，因首次患大病的他，擔心得叫了家中所有人到醫院看他。因事態突然，我也擔心得忍不住在辦公室哭了出來；去到醫院，看見他安好無恙才叫放下了心頭大石。臨走前他竟然對我說，在眾多孫兒之中，他最擔心的就是我........聽到後才知道，我才是他最痛錫的一個。
昨晚飯局完後，離開時他對我的老公說，要好好照顧我，因為我就是他的孫女噢...........好感動 ~~~
想起小時每天都會陪爺爺去喝西茶，每天都是煎雙蛋華田，非常懷念。
希望爺爺身體健康。

自近幾年爺爺的身體開始出現許多老人病,不過最令我們費心的就是他的老人痴呆症. 這兩年他已經開始不認得我們了,上文提及過的14個孫兒,他都不是認得許多個.還好他對我還有一些印象,或者因為小時候跟他生活過吧.但都不知道他是真記錯,還是假認得,因為仔已經開始對身邊的人有幻覺了.

麻麻身體也不好,家中兩個老人要互相照顧也不是容易的事.

家中兄弟姐妹多,但各人也自己有一個家要兼顧,都不可以經常去探望兩老.有時反倒覺得,送他們到老人中心可能會得到更貼身的照顧,而且又有同輩老人為伴. 相信近年的老人服務已不再是以前那些午逆子女拋棄父母的地方. 不過明白家中總有腦閉塞份子,想必多過幾年真的要作此決定時又引起一番爭論.

祝爺爺麻麻身體健康.

喜歡祖兒

此姝於2000-2001出道時, 我都不是太留意她,只記得好朋友說她唱的"未知"雖很好聽,但唱腔似乎是在模仿原唱者. 不過好朋友說再聽她的"逃避你", 總算確定她是唱得之人.
後來在2002-2003年不知誰的好事,竟說我的樣子有些似她.....撞鬼!當時她仍然未紅,而最重要的是當時盛傳她被其公司老闆包起........曾有人問我介不介意被傳.....對不起,不是我被傳耶!
事過境遷, 容氏越來越紅, 越來越多人說我似她,於是我就越留意她,也越喜歡她.
喜歡她真的很用心唱歌, 每一次唱現唱都是聽得出用心唱的. 什麼叫不用心?請留意楊氏. 很記得祖兒在一次演唱會中說過, 做一個歌手要聲色藝兼備 (撞鬼當時又盛傳佢整容), 她說自己只是唱歌好是不夠的. 所以就算她真的是整過, 我都不會介意. 一個歌手站在台上, 全身都被注目, 一個全能藝人, 該有美貌歌聲舞姿等等.....只懂唱歌不靚, 只靚不懂唱歌, 只懂跳舞不懂唱歌等等等等是不work的!
除了楊氏等歌手冇心機唱歌之外, 一聚新人唱得不好跟專注力也有關. 祖兒只專心唱歌很少拍戲, 多練自然唱得更好. 其他新人百足咁多爪, 有時間都去薄或者訓覺, 點會去練歌. 記得以前有個出過唱片的朋友, 她告訴我天后sandy及coco lee, 每天用6小時以上練歌練舞, 現在的新人用6小時執個廣告又賺錢喇!
上個月看保良, 鄧氏學人唱現場, 頭一首慢歌每個音都危危乎, 雖然最終冇走音, 但一點都不悅耳. 之後更驚, 佢學人唱快歌, 又跳又唱現場, 唱到中間你都擔心佢會唔會死.
反觀祖兒最近個唱, 盡顯其工架, 快歌慢歌不時穿插, 仍然ok. 20分鐘勁舞過後, 再以超靚聲唱隻"我的驕傲", 死未? 不過不是想吹噓她很棒, 只是想說這一切都是作為一個歌手最基本的.
有些人常說她唱的是k歌, k歌又如何?k歌就可以不用心唱?好些她的k歌, 你去唱k也唱不到.不是一定要曲高和寡, 冇人聽得明既音樂才叫懂音樂. 有很多很順口的經典金曲都是k歌. 只係少數人覺得果d聽十次都唔順耳既歌叫做有型吧.
當然如果不是上一輩的天后紛紛退出, 楊氏又想嫁再沒有心機唱, cc又曲高和寡d歌唱極唔hit.......祖兒未必有今日的成就. 天時地利人和在做什麼事情都重要.
不過無論點, 學星爺話, 凡事只要用心, 就一切都做得好.

考場百態

年中經常監考,閱歷無數考生,百態之奇令人驚叫.

1. 考試唔帶筆. (好想叫佢用血書, 應該會高分d)
2. 考maths唔帶計數機. (佢可能想試下用珠心算)
3. 剛宣佈可以開始作答, 佢舉手問你可以開始未. (此乃作死)
4. 剛宣佈所有人不可以離開,佢舉手問你可唔可以早走. (此乃找死)
5. 出貓, 被發現後把A4 size既貓紙生吞.
6. 伸懶腰扮舉手, 等你衝過去.
7. 由台下嗌上台, 話好急要去厠所. (全hall 200人都聽住)
8. 某xx師考試要用兩種顏色既answer book, 開考前後左右提左10次唔好用錯, 阿未來xx師在完卷時舉手話唔小心用錯左......(第時公司盤數真係靠晒你)
9. 某海外大學試9點開考,d考生8點去到考場死都要入去,唔比佢入, 去報館投訴!(而家d大學生真係ok架)
10. 考音樂試, 家長愛子女心切, 點叫都係企響個仔個旁邊, 直到你開咪叫佢離開, 佢離開...但又投訴.
11. 又係考音樂試, 家長愛子女心切, 話個禮堂唔夠光, 太凍太熱, 個hall太大.....最終都係投訴架. (我建議考試費加3千, 等佢地響屋企考, 我做主考既又可以去下d豪宅)
12. 自出自入, 無厘規矩：未經批准自己進入考場 / 未經批准自己走左出去
13. 問監考員條題目點解或者點做
14. 自己唔識答, 但堅持題目有錯.
15. 講左唔準用改錯帶等塗改工具, 佢問你塗改液得唔得...
16. 將自己張身份證對摺
17. 將自己個樣印上去個筆盒度
18. 考試個房寫住 Room 401, 佢問你點解唔係 Room 404.....
19. 入到考場會覺得d位係任坐, 坐窗口位囉

part time job

識我耐既人都知, 因為我母親的原因, 我由暑期工開始已經做兼職監考. 以前年紀細學歷未夠, 都是做監考員. 一般都係負責派試卷,點下名,收下卷等等. 悶到爆幾個鐘又收錢.
而家轉左做全職媽媽, 為左幫補家計打發時間, 又開始番呢個悶到爆既工作. 不過因為之前博左條老命讀完個degree, 而家就唔使做監考員, 做左試埸主任. 分別就係唔使派試卷同點名, 只係吩咐d監考員做. 做細既試埸都ok好做既, 不過一做大hall都百幾二百人考試就煩喇. 一定要好小心, 收少左份試卷就一世英名盡喪.
十年前同而家既考生分別都好大, 以前果d就連對住監考員都恭恭敬敬, 慌死你收完佢入試題會掉鬼左佢咁. 而家, 嘩, 個個變晒老細. 成人考生就玩遲度, 玩寸; 小朋友考生就玩傾計; 考生家長就玩投訴...唉.
做過監考既人都知, 果三粒鐘真係唔易過. 你試下響屋企, 三個鐘淨係望住張飯枱, 唔準講野, 淨係準企同坐. 真係會悶死. 我地圍內叫做燃燒意志.
不過有得做好過冇得做, 見得人多就見識越多, 下次寫下考生百態先.

Facebook

最近學人玩facebook, 雖然真係無無謂謂識得個名既都add一餐, 不過有時都覺得原因都識唔少人. 至少如果有一日我死左, 都應該有百幾人去我個葬禮度打個招呼.到時通知人葬禮既detail, 仲可以用super wall, 一野click左就send晒比所有人, 方便.
更加從facebook知道我在澳洲讀書時那間中學已經執左....仲打算遲d帶阿仔去參觀一下添.
今時今日科技發達, 我諗有好多小朋友已經不懂寄信.我由細到大就已經好喜歡寫野, 而家連吩咐賓賓做野, 我都喜歡寫紙仔. (亦都因為佢成日聽唔鬼明我講乜)
第時阿仔大個左, 我一定會教佢寫信比我!學左寄信先學send email.
唉, 佢地呢一代實在miss左好多傳統美好既事情!

方包廊重開

上一篇blog文章已經係成2年前既事,當時為左多點時間照顧阿仔而暫停,今次重開番都係因為轉左做全職媽媽照顧阿仔而多左時間.
呢兩年真係有好大既轉變. 2007年11月5日, 醫生證實兒子患有嚴重自閉症及中度弱智. 這個消息, 像一既刀桶到我心. 當時我抱著兒子, 看著醫生, 無言以對. 醫生不停的告訴我一些資料, 完全沒有入耳. 這個日子我永遠都不會忘記. 那天所有希望都粉碎,所有問號都出現.是我做錯了什麼?是什麼地方出了錯.到底是什麼地方出了錯?
今次我真的被打沈了.沈到現在自己都仍然覺得我只是危站在面臨崩潰的邊緣.感覺好像一切都穩定了, 但其實我一直都是在死撐. 除了撐, 還可以做什麼?我不習慣哭.只有在那天哭過一次.
心底裡很失落, 完全失去了所有預算. 之前的抑鬱又一下子番晒黎. 我係一個好需要事事有安排的人,有少許強迫症的我,很著緊事情的安排與細節, 每當遇到不在自己預計的事,就會覺得好消沈,好唔開心. 但係偏偏兒子的病,就是令我失去了所有預算, 亦無法再為未來做預算. 我的心一直都好像有蟻咬一樣, 坐立不安. 一時想這樣, 一時又想那樣.
現在兒子的情況雖然是很樂觀,大家都說他大有進步,成功在望. 但在我心底, 我只覺得仍然是見步行步,極大的進步仍然是無限的落後. 我絕對不想強迫兒子去學習, 但卻不能不做. 這樣的生活其實是令我很難受.我也很不想看到兒子哭.
每當在街上看見與兒子同齡的小孩,我就尤其心痛.常常在想,如果兒子沒有事,也許好像他們一樣,說話不停每事在問,我自己懷著兒子時也不知排練了多次如何回答兒子的問題,現在也用不上.
之前不斷在考慮入讀正統學校還是國際學校,現在只求不用繼續讀特殊學校已經很好了.之前想過兒子要學多種語言,因為讀書成績不好,但有一口流利的外語也可成功,現在我只求兒子能夠開口說話,叫我一聲媽媽.
好在好在好在好在好在,一百萬個好在. 有家人的支持.尤其是父母無私的貢獻,妹妹也好像因為此事而極速成長,真是來十世都報答不了.大家對我和兒子的愛, 就是默默的付出,真是令人感動到爆.
不過我從來都是堅強的, 事實就是事實,只有接受及面對,才可改變逆境.無數個成功的個案在鼓勵我們!我會與兒子一同努力!相信最慘的絕對不是我們. 兒子已經是同個案中最幸福的人.
對兒子的要求,已經是很簡單,不過要做得到, 都要下點苦功.
親愛的兒子心肝寶貝:媽媽不求你有出色的學業成績, 也不求你有成功的事業. 只想你可以開心健康,做一個好人.
我永遠都愛你.
讓我們一起努力.